نرجع ضيوف..
ارد اطلع عن طور
القصيد
واشرد من المألوف
واشخبط بلا قافيه
وزن و حروف !!
مال واحد ضايج
خلكه.. ولديرته ملهوف
حجي !!
قابل عليه كمرك ؟؟
ليش الخوف
وشبيه اني عبالك!!!
جاهل؟ يلوب مضيع
امه ولسه معيوف
طفل ؟يبجي كل الليل
محتاجله سفوف
من بالمهد... باكو
لعبتي لحد الزفوف
وانمسح كحل عيني
بالمصايب والحتوف
كالو قسمه ونصيب
واليحب ذاك ..معروف
لاتصفن ..ماتصدك
تعال .. و شوف
هاي المخده موسده
بيها الدموع صفوف
طافت علينه بكل
عمرنه الاذيه طيوف
سووا دنيانه جنه
و بيها معزز ومهيوف
انطونه سم ..بكاغد
الجكليت ملفوف
وصدكنه على النيات
نهرف وياهم رهوف
مرايات بوجهنه
وبظهورنا سيوف
غربان وتلايمن
تنعق فوك الجتوف
فرجه صرنا والما يشتري
خل يجي يشوف
ماكو رجه ..ماي واتبدى
من بين الجفوف
كالو عوف
.......
اي شعوف !!
عفت الكصيبه والتراجي
وجلاب الزلوف
شباحه وحجل ..زناد
مطشرات على الرفوف
شموع و حنه وياس
و دبجه و دفوف
روحي وردت قداح
يمهم ماتقبل تعوف
بكل زويه ذكرى اهلنا
متكلي شعوف!!!
غريبه وعيني عميه
من بعدهم ما تشوف
لو تصح رجعه والله
لأارجع ..لو جانت زحوف
بس مانرجع اهل البلد !!!!
احنه بوطنه نرجع..ضيوف
نضال احمد
باللهجه الشعبيه العراقيه
اسعدكم الله في اوطانكم اينما كنتم
ليست هناك تعليقات:
إرسال تعليق