يل تريــــــد حسين والجنة خـــتام
لاتلطخ ايــــــدك بمـــــــــال الحرام
------------------------------------------
مـــوكب حسين النصبته ومجلسه
بيه احــــــكام ودروس ومـــدرسه
بالــــــــــــــك بمـــال الحرام دنسه
الخدمة ذمة وعبره للمؤمن وسام
لاتلطخ ايدك بمــــــــــــال الحرام
-----------------------------------------
حسين مـــايقبل تسد درب الانام
حسين خدامه يجب عدها التزام
الدمعة تبطل لو خبز بيتك حرام
باچــــــــر بگبرك حسابك وانتقام
الدنيا تگظي.ومسكنك وادي السلام
لاتلطخ ايــــــــــــدك بمــال الحرام
-----------------------------------------
شفنه بالطف من اخذ حق البتول
راح ذكره وجرفة اعلومه السيول
الراد يمشي بمنهج ودين الرسول
موش للباطل يضل عـــــده ميول
خلي زادك صافي مـــن كل الاثام
لاتلطخ ايدك بمــــــــــــال الحرام
------------------------------------------
يا حسيني الخدمة مو بس بالشعار
الخدمة مـــوقف والتزام وباختصار
عف حــــرامك والصدك سويه منار
حتى باچـــــــر الك يشفع بالمدار
بالقيامــــــــة حسين يرفعها الكرام
لا تلطخ ايــــــــــــدك بمال الحرام
------------------------------------------
حسين مــــــو تمثيل تأخذلك صور
ولاتحط حزام خـــــــــادم ع الظهر
حسين ضحى بــــرگبته ودم النحر
وظــل عضيده هناك مرمي ع النهر
حتى تبقى الروس مروعة ويا هام
لاتلطخ ايـــــــــــــدك بمال الحرام
-------------------------------------------
عــــــــــدنان گعيد الــــــــــرحيماوي
ليست هناك تعليقات:
إرسال تعليق