(( بسنت خالد )) الطالبة بالثانوي الأزهري - ذات السبعة عشر عاما - تلك الفتاة البريئة من ( كفر يعقوب - مركز كفر الزيات بمحافظة الغربية ) الضحية التي تسبب نشر صور مفبركة لها في أن تتخلص من حياتها :أكتب تلك الكلمات إنصافا لها ومواساة لأهلها وردعا لكل من تسول له نفسه التلاعب بصور مفبركة لتعكير صفو حياة الحرائر والمحصنات .
بشعر العامية المصرية :
( ليه يا بسنت ؟ )
حتى لو غلطت بسنت
وانا عارف إنها بريئه
ما تستاهلش أبدا بسنت
الابتزاز باحقر طريقه
قررت تنهي حياتها
والسبب لوي الحقيقه
حتى لو شافت بسنت
مر الحياه وبلاويها
حتى لو غلطت بسنت
و الغلط مش بإيديها
الغلط من شاب جاهل
كان ناوي يشهر بيها
هددها بقلب جاحد
والدنيا سوده ف عينيها
يصورها متعمد عامد
الذنب عليه مش عليها
أرواحنا غاليه قوي علينا
ما يصحش نفرط فيها
وبناتنا دول ضي عنينا
يتهان اللي يفضح فيها
يا كل شاب مستهتر
راح منه الضمير أو مات
خلي اللي ماتت دي أختك
ولا بنت من الذوات
هل كنت تفضح كده أختك
بصور مسيئه عالشاشات
هل تقدر تنزل صوره
مهبنه لبنات الذوات
حرام ليه كل دا يجرى
دي الناس بتصنع حكايات
يا شباب ال ( هاكر ) بكره
تندموا على اللي فات
من عمركم في الأذيه
و فضايح تأذي البنات
ربنا ما أمرش بكده
ولا بقذف المحصنات
واللي يفضح بنت مره
يفضحه المولى مئات
خلي بالكم يا شباب
م التنمر عالبنات
من إساءه للشريفه
فقيرة ولا بنت ناس
وكل شاب أساء لغيره
يشوف الفضيحه علو الراس
الستر دا أفضل نصيحه
أنصح بيها م الأساس
يا كل أب وكل أم
لموا شمل الأسره لم
احتووا الأبناء وشوفوا
المشاكل سببها إيه
من غير أذى كونوا معاهم
من غير زعيق من غير ليه
طمنوهم واحضنوهم
اعرفوا دماغهم فيها إيه
حسسوهم بالأمان
وافتحوا باب الحوار
اسمعوا منهم كمان
واكتموا كل الأسرار
اقفلوا باب الشيطان
تنطفي من بعده نار
يرحم المولى بسنت
اللي كانت زينة الدار
--------------------
بقلم د / عبد الرحمن فتحي الحناوي .
من مصر .
الثلاثاء ٤ من يناير ( كانون الثاني ) سنة ٢٠٢١ .
----------------------------
ليست هناك تعليقات:
إرسال تعليق