بشعر العامية المصرية.
( شعره أبيض زي قليه )
شعره أبيض طاب وماله
زي قلبه يا جماله
طول ما قلبي ويا قلبه
يِحلا بينّا الانسجام
شعره أبيض بس عاقل
لما أزهق يبقى شايل
همي كله وييجي قايل
إنتي روحي يا مدام
شعره أبيض زي الفل
شكله أحسن لما يطل
لو حصللي شيء ممل
صدره آجي عليه وانام
شعره أبيض بس ناعم
طول حياته ليا داعم
فيه ما بينّا روح تناغم
والحياه ماشيه تمام
كام سنه بيني وبينه
عقله أكبر دا يزبنه
مش هاممني كبر سنه
حاسه ويّاه بالأمان
إنتو مالكو ومال حبيبي
طبعه أحسن من قريبي
لو تعبت يقوللي سيبي
اللي ف إيدك انا خدام
اوعوا تقولوا عليه عجوز
شوفوا لابس شورت وشوز
في السباق يكسب ويفوز
ما بيشتكي من أي آلام
عمره عليا ما كان بخيل
على حبه ليا ألف دليل
وكلامه كله. فيه تدليل
حقيقه والله مش أوهام
********************
بقلم د / عبد الرحمن فتحي الحناوي .
من مصر.
الثلاثاء ١٩ من نوفمبر ( تشرين ثان ) سنة ٢٠٢٤
ليست هناك تعليقات:
إرسال تعليق