من غير خلاف
الشاعر: عاطف محمد
فوق سفينة حزننا
بنسافر
فوق خرايط الزمن
بنعافر
بشر من غير وطن
تايهين
زى العصافير الطريدة
معندناش أشياء جديدة
معندناش أحلام سعيدة
معندناش بكره اللى جي
من غير ورق بنسافر
من غير كفن بنموت
وإن عشنا
بنعيش
من غير كلام
ولا صوت
ولا دوشه معموله بصاجات
ولا جلجلات
ولا همهمات ولا نمنمات
وإن عشنا
بنعيش
من سكات
الكل بيبعنا ببلاش
من غير فصال
ولا نقاش
زى العبيد
بيشترينا نخاسين
ويبيعوا فينا كل يوم
ويقبضوا فينا التمن
من أيد لأيد
يتناولوا فينا كالعبيد
زى المعالق والكوبيات
ويشربوا من دمنا
تملى نجري ف همنا
كل يوم مشاوير طويلة
يغتالوا أبسط حلمنا
حتى البقية ف حظنا
بقت تراب
معجون عذاب
ونروح ندور
ع اللي يقبلنا معاه
عن قبيلة تلمنا
وستارة غامقة بتدارينا
وتبقى مأمن م الزمن
وسكن بيستر عرضنا
مانلاقيش
لا ضل باب
ولا حتى شيش
ولادنا شاخوا م الأمل
مش راضي مره
يوم يجيهم
أو حتى لحظة
بيراضيهم
بيفتشوا
جوه المعاجم والكتب
عن أى حاجة تدلهم
عن جنة خضرا
فيها عيد
عن كذبة قادرة
بسور عنيد
عن حاجة عارفينها زمان
اسمها ..أرض الأمان
الظاهر الأسماء غيوم
مش باينه حتى للعيون
وأكيد ده له مليون سبب
أسماءنا يمكن
مش شبهم
مش مكانهم
مش زمانهم
مش معروفين
للى شاربين العسل
واللى متلغمط بطين
حتى اللي شاربين الدموع
باينهم مايعرفوش
مابيشفوفش
تفصيلة حتى ف شكلنا
ولا عدى حتى اسمنا
على الجلوس
أصلهم جوه النصوص
معلبين مغلفين
مافيش خروج
ع النص أبدًا
مالحلم متفسر كده
هانشك ليه طب ف الإمام
ونقول ده تفسيره غلط
اخرس ماتنطقش كده
اللسان مقطوع أساسا
من يوم ماكنا فى الحشا
واتولدنا ف الغروب
النطق بلَّغ للهروب
مالهوش وجود
عايش ركود
علشان عيونهم
راصدة كل التحركات
والعيش بتاعنا بله خوف
وعيشنا م الخوف اتهرى
لاء واتفرى
فتافيت أسامي
لو قولنا ياحامي الحمى
أحنا اتظلمنا
أكلونا مالنا
وظلموا حالنا
نايمونا مخنوقين
تلقى الجواب حاضر سريع
ممنوع شكاوي
الشكوى للحامى غلط
قلة أدب
وجليطه
وسفسطه وهلفطة
طب نشتكى لربنا
عن غدرهم وظلمنا
ممنوع شكاوى
هاتقولوا أيه ؟؟!!
أنتوا ف نعيم
بلاش بطر
بلاش هطل
ويبصوا لينا
بصة مش
مظبوطه كده
كأني واحد واتسطل
يدونا تأشيرة خروج
بره الزمان
بره المكان
نزعق نقول
طب هاتوا ورقة مسطرة
أو حتى ورقة معفرة
أو نص ورقة مخرمة
ومعاها بالمرة قلم
نكتب قصيدة للألم
أو وصية بدون ندم
مااحنش هانكتب
مسخرة
خلاص خلاص
مافيش شكاوى
يأفلوا ويأفلموا
على كل شئ
الموضوعات
يغيروها ويبدلوها
ويصعبوها ويسهلوها
واللى قدام
يبقى ورا
وتلاقي كل كلامنا مصلوب
ع الحيطان
مكتوب عليه
أكاذيب زمان
وملونين الخط
بالكره الغميق
وزفة فيها ألف نار
تحدفنا جوه بير غويط
له حرف متكسر ضعيف
مشنوق فى وسط المندرة
وتحس يومها أنك أنت
من ثقيف
لما ظلموا المصطفى
غارق ضياع غارق نزيف
اللحم يتحط ف رغيف
والدم يتعبى ف أزايز
بيبعها واحد
لابس عباية مرقعة
وفوق دماغه قبعة
ولقتني مكسور حتتين
زى خشبة
متاخده عافيه
من فرعين شجر
خشبه ناشفة مألحفه
مردومة أوراق الخريف
والشجر حوليا مقلوع م الجدور
ف حته سكنه ف الخفا
فعيونا بصت بصتين
خوِّفها صوتنا
لما شوفنا ناس كبيرة
بدم أزرق
دم ملكي دم تاني
نازلين ف شخط
ونطر فينا
وأحنا
من نسل الجواري
لاسادة الأُوم ..يعرفونا
ولا الرعاع
ولا حتى من فرط وباع
قولنا نهاجر
من المواني الزرقا
وأحنا تعبانين
مدهولين
ونروح بعيد
دوَّرنا حبة كتير
أوي
وبرضه برضه
ملقناش
بلاد تعوزنا
ولا لازمهم شكلنا
بالنسبة ليهم دمنا
دم ناقع
لا إيهاب نافع
ولا سناء شافع
مااحنش كوادر ولا تعابين
ولا ملايكة ولا شياطين
اسمنا مكتوب غلط
بحروف زلط
مش مأريين
أصلنا
كتب قديمة
سطورها كالحة مهببه
روبابيكيا من
بتاع زمان
والمدن معمولة
م الملح العتيق
تعمل مدابح للكتب
أو حرق علني للحروف
وأحنا الكتب
المدبوحين
أحنا الضحية والخروف
قولنا نتلم ف كهوف
ومعانا جوازات السفر
علشان نسافر
فى أي لحظه ممكنة
فيها أمان
قبضوا علينا
بامتننان
قالوا جوازاتكم لئيمة
مزورة
ماهش سليمة
وعملها إبليس
مش شيطان
مالناش ف شغل الألعوبان
ومن زمان
دبسنا فيها ابن اللذينه
طب حد يعرفنا ويخدنا
الكل من بنها عمل
قولنا ننافق
نكتب ونمدح ف الكيان
بس الكلام
ماعجبش خالص
ولا كل معاهم
قولنا نسافر
بره الزمان
بره المكان
بره الحدود
بره الوجود
أدونا بس فلوس نعيش
الرد كان مليان برود
قولنا مافيش
طب حتى حبة انتماء
بردك مافيش
طب أى عنوان أو أسماء
بردك مافيش
بناتنا طيب أو أبناء
ودول كمان بردك مافيش
قولنا نتوكل ونمشي
من غير مطالب
بس سبنا كلمتين
فوق الحيطان
كل العصافير ليها وطن
وحيطان وباب
كل العصافير ليها زمن
ماهوش خراب
إلا العصافير الشقية
اللي عاشت
تحلم وطالبت بالحرية
واعلنت فيها احتراف
وعشان كده
هاتموت أكيد
بره الوطن
من غير خلاف
ليست هناك تعليقات:
إرسال تعليق