وَيَّا قلبِك
بقسم الوقت الحزين
جنب منك
أصلي أقرب حدّ ليكي
حتى إيدي حالفة ما تفارف إديكي
فاصبري استقوي بيّا
سيبي بينا الحزن يفضل قسمتين
وإن برضوا الفرح لما يدق بابنا
هيلاقينا روح بتفتح مش روحين
ويا قلبك بفتكر كل اللي فات
مالسنين دايما تسيب الذكريات
هو دا طبع الحياة
اللي فارق فينا عايش
واللي عاش من بعدو مات
كلها حبة ساعات
مش بنعرف حتى بكرا واخدنا فين
بس أقولك:
كل ذكرى فينا عاشت
في الضلوع تنزف حنين
بتدوينا وتآنسنا باللي راحو
لما نبقى مشتاقين
ويا قلبك في الجراح
ببكي زيك عاللي راح
وفي عيونا الدمعة تنزل دمعتين
بقسم الأيام معاكي
محنا واحد
صعب نصه يكون سعيد والتاني باكي
ما انتي أصلا فيا نصّي
بس جوا عنيَّا بصي
هتلاقيكي جوا قلبي بس بصَّة من العنين
ربي واحد
حسبي ليه سلمت أمري
عمري واحد
وانت أصلا كل عمري
بس لما الضربة تقوى
هنقابلها بكل تقوى
عالجراح بالصبر نقوى
مهما طال ليل الأنين
كل حاجة فيكي مني
حتى دمك هو دمي
حاسس أمي هي أمك
وإن أمك هي أمي
وعد أفضل عمري جنبك
زي ضلك مش هفارقك
طول ما وعد الحر دين
.....
صلاح العشماوي
ليست هناك تعليقات:
إرسال تعليق