((يا دنيا حاسبي))
يا دنيا حاسبي.. هشكيك لربي
وأجيب أخويا يشهد وصاحبي
ليه بس يعني.. قاهرة قلبي..؟.
رامية شمال.. مش واقفة جنبي
قاسيت كتير.. وأموري مالت
جراح في قلبي والشوك في دربي
مابقيتش عارف مين هو صاحبي
نروح ونيجي يتوه طريقي
الفرح رايح والجرح صابح كابوس حقيقي
خابت معايّا ولا مرة صابت
واجعني قلبي.. معاكِ يعني
غدر وخسة وندالة فيكِ
مش بيّا حاسة.. ولا أيه يرضيكِ
غريب جرحني.. وقريب دبحني
ناس مريضة بعيون ما نامت
هشكيك يا دنيا.. في كل ثانية
جاية عليا.. ولا ليا ديَّة
فيكِ اللي بايع وأنا اللي شاري
فيه أيه يا دنيا.. بتبيعي فيّا
دموعي منك على الخد سالت
طيب يا دنيا.. خليك دنيا
ومصاحبة ناس ياما عابت فيك وقالت
معاهم سيري.. بالفرحة طيري
وناكرة خيري.. واخدة غيري
صف أول.. وتانى..
وأنا اللي فيكِ صف تالت
حرام يا دنيا.. تعالي مدي
وبلاش تكوني واقفة ضدي
ليه ليّا ناسية ومعايّا قاسية
وأخر حلاوة كمان وماشية
ويَّا ناس.. ضمايرها ماتت
فيه أيه يا دنيا.. سبيني سيبي
مَهو كله منك.. خرمالي جيبي
قولي يعني.. أيه هو عيبي
ومين عدوي من حبيبي
راح فيكِ عمري وأيامي ضاعت
قوليلي يا دنيا.. مين غواكِ
وانا اللي بحلم أعيش هواكِ
اصحي فوقي.. اصتبحي روقي
بعدين معاكِ.. طالب رضاكِ
ولا فيوزك ضربت وساحت
أحمد الغرباوي
ليست هناك تعليقات:
إرسال تعليق