((بموت فيك))
أحِبك وإِنت شقي..
وأموت فيك تصدّقي..
سهمك صابني الحقي
دمي بينزِف..
على أيه بس بتحلف
اوعِي فيه تِغرَقِي..
اعطيني عنوان بيتكم
واجري هناك اسبقي
جايب الْشبكة وجاي
الحقي البسي.. واتزوقي
معايا أمي وأبويا
والحلو شايله أخويا
بمبوني شربات وياهم
وناس كتير سبقاهم
بحاجات كتيرة وياهم
بلي الشربات فرقي
وإوعي فيه تغرقي..
جاتوه وعصير وكولا
والشبكة مش معقولة
احلمي حبيبتي اطلبي
أسورة واتنين.. خاتم ودبلتين
وكلمة من حرفين
منقوشة في كوليه
يا ما شاء الله عليه
دلاية ألماظ بدورين
ومعاها كردان بندوقي
افرحي وكمان روقي
جوزين وتلاتة غوايش
عنك أنا مش حايش
الأهل والأحباب
سابقين هناك على الباب
ومعاهم المأذون
بلي الشربات فرقي
افرحي.. ارقصي.. زغرتي
هكتب عليك الليلة
من الفرحة اوعي تفرفري
شايلك فرحة كبيرة حلوة جميلة
لمينا عليها العيلة
ومعايا هتسهري
بموت فيك تصوري
أحمد الغرباوي
ليست هناك تعليقات:
إرسال تعليق