أخر رسمة
________
قول ع الدنيا السلام
شايفين ف سمانا حمام
بيرمح رمح
خايفين منك ياحمام
لتكون ف لحظة صاروخ
خايفين؟!!
أه خايفين مش من الموت
لأ
خايفين.. إزاي ما ح يبقوش
إنزل ياحمام
غنى عدودة وموال
وغطي الشهدا الأطفال
ولملم باقي الكراريس
إنزل ياحمام لم لكوام
صحن المدرسة
بقى كتلة نار
عد الشهدا وعد الكم
كراريسهم شاربة دم
وهناك الواد
إللي م كمل حرف الكلمة
والتاني كمل باقي الكلمة بدمه
وعيل اخر كلمة قالها
ح اموت
شايف ياحمام...
شكل الموت
جديد ع الدنيا..
شكل الموت
ياحمام...
قول للأطفال الباقية
تنقش بالدم حبة جوابات
كل سطورها من دم اخواتها
إللى مابقوش أطفال
ياااااأطفال
أصرخوا لضمير الدنيا النايم
قولوا للحكام
يختشوا ع الدم
قولوا مين ح يشم
ريحة كراسة الواجب
أخر واجب
كان موضوعه
(أحب أكون)
أخر رسمة
كانت
غصن الزيتون
الناقد
حمدي البوقي
ليست هناك تعليقات:
إرسال تعليق