((أختك فين أمنها))
ابعد عني متفورش دمي
ده انت يا واد مش لاقي القوت
عامل فيها حبيب وصايع
وفي جيبك كام سحتوت
ومن الأخلاق تايه وضايع
وجاي تملى عليَّا شروط
بتقولي عنك أنا مش راجع
طيب شوف مين فينا
هيتمنى الموت..
كلمتين مني وكن سامع
بيني وبينك مليون مانع
أولهم فين حق الشارع
وثانيهم حق الجار والجامع
وثالثهم وطن واحد وبيوت
وان كنت فاكرني لقمة طرية
أوحتى سهلة ومستهون بيَّا
أقربلي منك ساعتها الموت
وان كنت فاكر قلبي هفية
أو حتى لك عندي قيمة أو دية
اضرب راسك بالشلوت
بطل يا واد تعاكس فيا
واعرف مين البنت دهيَّ
أنا ممكن أوقع صف اسنانك
وتقول غيتوني وترقع بالصوت
مش كل الطير يتاكل لحمه
وكتير زيك يستاهلوا الموت
ليه بتضيعوا من الأخلاق..
وبكل بساطة تهدوا بيوت
ابعد غور عن طريقي
من قدامي اخفى وفوت
ده انا بنت أصول ومتربية
واعرف أصد بسهولة زيك ميت هلفوت
فاكرني أيه.. لعبية..
بنت رخيصة شمال وغبية
وهسمحلك تلعب بيَّا
وهصدق فيك حسن النية
رايح جاي تغني عليا
يالا على امك إجري ياكتكوت
شوف اختك فين أمنها
دى الحالة مش عايزة سكوت
لو اختك في هنا مكاني
ومكانك أخويا..
كنت ساعتها هتتمني الموت
أحمد الغرباوي
ليست هناك تعليقات:
إرسال تعليق